علشان انا مصرى يبقى لازم تسمعنى

عشان أنا مصرى يبقى لازم تسمعنى
كلام هاقوله وأجرتى على إللى خلقنى
طول عمرى وسمعتى الطيبة بتسبقنى
فى بر مصر .. ولا براه دايما بتلاحقنى
يقولوا المصرى أهه الدنيا كلها تعرفنى
الكرامة والشهامة معرفات فى بطاقتى
والعلم والمعرفة كلها متاخده من حضارتى
صحيح أنا ريحتى عرق
لكنها ريحة عرق جبين كرامتى
ومين فى الدنيا ما عندوش هم وغرق !!
المهم هو احتمالى وسماحتى

* * *

لما ندهتنى وقولتلى إلحقنى يابن والدى
جريت عشان أنجدك وفوت كل ما بيدى
ما أقدرش أتأخر عن أخويا العربى
انصبت واستشهدت .. فداك .. وإيه يعنى !!
طالما إحنا إخوات يبقى همك هو همى
عاوز تخضر أرضك !! طبعا .. أرضك قبل أرضى
عاوز حد يعلم ولادك !! وماله .. وأجرته كمان من عندى
عاوز تطلع بترولك !! أسود فى لون أرض بلدى
أحلامك وأمنياتك بالنسبة لى أمر فورى

* * *

يوم ورا يوم اتسرق العمر منى
شيبت ودقنى إبيضت وانحنى ظهرى
وما عدتش قادر أدور على رزقى
جابو الحكيم قالهم يغيروا لى جوى
قلت مافيش غير أخويا العربى
شهم وأصيل وهيدارى على شمعى
وحسبتك عكاز يشيلنى بدال رجلى
لقيت بابك مردود ومقفول فى وشى
وياريتنى ما جيتك ولا خطيت باب بيتك يا ريتنى

* * *

هاستحمل التعب وهاشد حيلى
وطلوع النهار هيكون مفاجأة لليلى
والخير كله هيرجع فى نيلى
وسواعد ولادى هتخضر طريقى
وهييجى اليوم إللى فيه ترجع تنادينى
ساعتها بس .... موش حاسأل فيك .. وبس ؟؟
لأ .. هاقوللك أأمرنى يا أخويا .. من عينى
وما يهمكش إذا كنت إنت ناسينى
والله باحبك من قلبى الجوانى
وعيب عليك تظن فيا كده ..
ده إللى بنى مصر كان فى الأصل حلوانى

مشكور مصطفى بارك اللة فيك فى انتظار جديدك